...

...

" تجول فى الموقع وحدث مخك بنجاح ... سوف تجد كل ما هو جديد ومفيد وممتع " ... للتسجيل فى الموقع : هــنـا ... للتواصل معنا : هـــنــا
...

بخيت وأميمة والمولود الجديد ....

.
هذا الموضوع له علاقة بقسم : إضحك من قلبك ، ثقافة لذيذة


المشهد الأول :


" يظهر بخيت فى مترو أنفاق مكتظ بالركاب وبجانبه زوجته أميمة وهى حامل " أميمة : " تصرخ " ودينى عربية السيدات يا بخيت شكلى هولد في المترو... الواد خلاص بقى على طرف الفستان .

بخيت : " يحاول تشغيل المروحة لكنها تدور بالعكس فتشفط الهواء " عايزك تاخدى نفس عميق ف أقرب فرصة يجيلك فيها هوا !!


أميمة : مش قادرة ... دا أنا لو نفضت هدومى الواد هينزل .


بخيت : سامحينى يا أميمة ، ياريتنى كان معايا فلوس حق تاكسى لغاية المستشفى ... ع الأقل كنا جبنا بيها حاجه كلناها واحنا في المترو .


قطع .




المشهد الثانى:


" يظهر بخيت فى مستشفى حكومى أمام حجرة عمليات "

الطبيب : " يخرج " نسبة الستات اللى بتولد عندنا كل أسبوع أكتر من نسبة توزيع قصب السكر في الحوامدية .

بخيت : " فى توتر " هات المفيد يا دكتور بدل ما أخبطك في قفصك الصدرى أخليك تجيب عليه العيش كل يوم الصبح .


الطبيب : جابت ولد ...


بخيت : ربنا يستر على المصاريف .


الطبيب : العيل اللى بيتولد بيجيب رزقه معاه .


قطع .




المشهد الثالث :


" يظهر بخيت أمام مديره فى العمل بكافتيريا " .


المدير: يسعدنى أقولك يا بخيت إنى لقيت واحد هيشتغل بدالك وبضعف مرتبك كمان .

بخيت : ليه يا فندم !؟ ... دا أنا وفهمى شغالين معاك في الكافتيريا من أيام ما كان فيها كرسى واحد .


المدير : ولا فهمى برضه هيكمل معايا !! .


بخيت : مش مهم فهمى ... بس ع الأقل انت خالى وامى موصياك عليا .


المدير : أمك كمان ياريت ما تتصلش بيا .


قطع .




المشهد الرابع :


بخيت : " لأميمة ( خمسين جنيه مصاريف أكل الواد في يوم وهو لسه ما اتفطمش ) أمال لما يطلعله سنان هيعمل فينا إيه ؟!

أميمة : لاحظ إنه طفل ... وبالمناسبة الببرونة بتاعته ما فيهاش ولا نقطة رضعة .

بخيت : الواد دا لازم يتباع !!

قطع .



المشهد الخامس :


" يظهر بخيت مع جاره معاطى وفى يده حلة غويطة "

بخيت : ما عندكش شوية لبن صغيرين يا معاطى للواد ابنى يسد بيهم اى خندق في معدته ؟؟

معاطى : منعته والله من ساعة ما غلى ... انت عارف يعنى لو كان عندى...

بخيت : " يقاطعه " ماكنتش اتأخرت ... ولا يهمك .

معاطى :
لأ كنت عملت رز بلبن !!


قطع .


هل أعجبك الموضوع ..؟ هل استفدت منه ..؟ هل تتفق أو تختلف مع محتواه من وجهة نظرك ..؟ ننتظر منك تعليقك هنا أسفل الموضوع

Share/Bookmark

هناك تعليق واحد:

تعليقك سيظهر مباشرة بعد مراجعته :